Помассьӧ 2023 во. Миян государствоыс йитіс сійӧ Велӧтіськӧт да сы туйдӧтіськӧт. Таво Велӧтіссезлісь удж бурсьӧтана Коми-Пермяцкӧй институтын уджаліссезӧн вӧлі керӧм быдкодь удж, кӧда йитсис школакӧт, велӧтіссезкӧт да велӧтчиссезкӧт.

Таво медодзза вӧлі чулӧтӧм чужан кыв сьӧрті велӧтіссезлӧн Съезд, кӧда вылын вӧлі аркмӧтӧм Чужан кыв сьӧрті Пермскӧй крайись велӧтіссезлӧн чукӧр. Съезд вылын асланыс опытӧн торйӧтчисӧ не только коми-пермяцкӧй кыв сьӧрті велӧтіссез, но и татарскӧй кыв сьӧрті. Аттьӧалам велӧтіссезӧн бур опыт мыччалӧм понда.

Коми-пермяцкӧй кыв сьӧрті велӧтіссез понда чулӧтсисӧ велӧтан семинаррез. Эта воӧ Лабораторияись уджаліссез чулӧтісӧ коми-пермяцкӧй кыв сьӧрті кыкьямыс велӧтан семинар Кудымкарскӧй, Кочёвскӧй, Косинскӧй районнэзын, Институтын, Кудымкарын этнокультурнӧй центрын, кӧднаын участвуйтісӧ округись чужан кыв сьӧрті велӧтіссез, институтісь юраліссез, лабораторияись уджаліссез, ылісь локтісь гӧссез да аймаммез. Семинаррезлӧн удж муніс Дерябина В.В. юралӧм увтын.

Медодзза мог велӧтан семинар одзын сулаліс – сетны  коми-пермяцкӧй кыв да лыддьӧтан уроккез сьӧрті округись велӧтіссезлӧ чужан кыв велӧтан уджын отсӧт. Темаэз вӧлісӧ быдкодьӧсь:

- кыдз позьӧ велӧтны школаын коми-пермяцкӧй кыв, кытшӧм формаэз да методдэз отсӧтӧн;

- проектнӧй удж сьӧрті велӧтан семинар, кӧда мыччаліс, мый велӧтіссез кӧсйӧны тӧдны проекттэз гижӧм йылісь;

- коми-пермяцкӧй кыв велӧтӧмын стандарттэз да виль программаэз йылісь;

- функциональнӧй грамотность йылісь, кыдз пыртны коми-пермяцкӧй кыв да лыддьӧтан уроккез вылӧ, внекласснӧй уджӧ;

- кытшӧм пуктыны мог урок вылӧ, медбы челядьлісь зорӧтны сӧстӧм сёрни, медбы зорӧтны лыддьӧтӧм сьӧрті кужӧммез, небӧг дынӧ радейтӧм;

- кыдз уджавны коми-пермяцкӧй литература сьӧрті начальнӧй да основнӧй школаын, кытшӧм пуктыны мог урок вылӧ, кытшӧм технологияэз сьӧрті уджавны велӧтісьлӧ и кытшӧм результат дынӧдз колӧ локны челядькӧт уроккез коста;

- коми-пермяцкӧй кыв уроккез вылӧ информационнӧй да коммуникационнӧй технологияэз пыртӧм йылісь.

Ыджыт аттьӧ кӧсъям висьтавны нылӧ, кин мыччаліс ассис удж семинаррез чулӧтӧм коста:

– Фирсова Валентина Васильевналӧ, начальнӧй классэзісь Кекурись велӧтан керкуись велӧтісьлӧ, кӧда сетіс кык урок, сӧстӧма сёрнитіс чужан кыв вылын, мыччаліс стандартлісь корӧммез, быдкодь методдэз да приёммез чужан кыв велӧтӧм сьӧрті,

– Яркова Ирина Ивановналӧ, Белоевскӧй школаись велӧтісьлӧ, кӧда бура тӧдӧ виль стандартлісь корӧммез, нуӧтӧ колана удж, велӧтӧ вежӧртны медшӧрсӧ, пыртӧ аслас уроккез вылӧ вильсӧ, активнӧя участвуйтӧ велӧтан семинаррез вылын;

– Павлова Людмила петровналӧ, Сепольскӧй школаись велӧтісьлӧ, кӧда мыччаліс быдкодь методдэз да приёммез, кыдз позьӧ зорӧтны велӧтчиссезлісь сёрни, сувтӧтіс быдкодь проблемнӧй ситуацияэз, медбы судзӧтны урок вылісь моггез и локны велӧтан результаттэз дынӧ, тӧдсӧтіс школьнӧй музейӧн;

– Брызгалина Татьяна Ивановналӧ, Сепольскӧй школаись велӧтісьлӧ, внекласснӧй удж устнӧй народнӧй творчество сьӧрті нуӧтӧм понда, кӧда пыдына кужис мыччавны, кыдз позьӧ донтны частушка;

– Семерикова Жанна Васильевналӧ, Порошевскӧй школаись велӧтісьлӧ, кӧда мыччаліс быдкодь методдэз да приёммез, технологияэз, тэчис проблемнӧй ситуацияэз, медбы судзӧтны урок вылісь моггез и локны велӧтан результаттэз дынӧ;

– Щербакова Людмила Семёновналӧ, Порошевскӧй школаись велӧтісьлӧ, кӧда кужӧмӧн да бытшӧма керӧ ассис удж: пыртӧ урок вылын быдкодь приёммез, методдэз, корӧ челядьсянь пуктыны ас одзаныс мог да локты результатӧдз, донтны ассиныс удж, керны исследовательскӧй да проектнӧй уджжез, велӧтӧ, кыдз нійӧ колӧ дорйыны.

Думайтам, что семинаррез вылын уджалӧм туйдӧтас велӧтіссезӧс одзлань уджавны ФГОС-лӧн виль корӧммез сьӧрті коми-пермяцкӧй кыв да лыддьӧтан уроккез вылын.

Перемын медодззаись «Академия первых»-ын вӧлі чулӧтӧм смена кыкдас челядёк понда, кӧдна пыдынжыка пырисӧ коми-пермяцкӧй кыв историяӧ, проекттэз да исследованнёэз гижӧмӧ. Сентябрь вӧлі чулӧтӧм курс «Олимпиадный коми-пермяцкий язык». Сідз жӧ миян округись челядь велӧтчисӧ «Парма литературная» дистанционнӧй программа сьӧрті. Челядь понда программаэз лӧсьӧтісӧ лабораторияись уджаліссез Т.Н.Меркушева, В.В.Федосеева, М.В.Вилесова. Висьталам аттьӧ нылӧ, кин ӧтлаын уджаліс челядькӧт – А.С. Лобановалӧ, Е.М.Матвеевалӧ, Н.А.Трубиновалӧ, О.А.Поповалӧ, В.В.Козловлӧ, М.Е.Галкиналӧ, Т.Н.Меркушевалӧ, В.В.Федосеевалӧ, М.В.Вилесовалӧ. Ыджыт аттьӧ висьталам быд велӧтісьлӧ, кӧда отсаліс ӧктыны школаэзісь челядьӧс этна курссэз вылӧ, баитіс аймамкӧт, ӧктіс колана документтэз, туйдӧтіс челядёкӧс.

Кыдз и быд воӧ, вӧлісӧ чулӧтӧмӧсь входнӧй да итоговӧй диагностика коми-пермяцкӧй кыв сьӧрті. Челядь мыччалӧны не умӧль результаттэз коми-пермяцкӧй кыв велӧтӧмын.

2023-2024 велӧтчаын во пондӧтчикӧ чулаліс входнӧй дианстика, кытӧн начальнӧй школаын 580 велӧтчись ӧтлаын шедтісӧ шӧр балл 3,9, а основнӧй школаын 729 велӧтчись – 3,7 балл. Эстӧн кӧсъям аттьӧавны нійӧ велӧтіссесӧ, кӧдналӧн велӧтчиссес арся диагностика коста вермисӧ судзӧтны вылын шӧр баллэз: 4,5 – 5 балӧдз. Аттьӧ висьталалам В.И. Жижилевалӧ (Порошевскӧй ООШ), Л.П. Павловалӧ (Сепольскӧй ООШ), Ж.В. Семериковалӧ (Порошевскӧй ООШ), Т.М. Трошевалӧ (Разинскӧй НОШ), Н.Н. Бачевалӧ (Дёминскӧй ООШ), А.Н. Тиуновалӧ (Сергеевскӧй СОШ), Р.Н. Голевалӧ (Левичанскӧй ООШ), М.А. Ильиныхлӧ (Чазёвскӧй ООШ), Т.И.Гусельниковалӧ (Гуринскӧй СОШ), Н.В.Бражкиналӧ (Белоевскӧй ООШ), В.А. Данилкиналӧ (Чураковскӧй ООШ), Л.С. Щербаковалӧ (Порошевскӧй ООШ), С.Е. Федосеевалӧ (Тиминскӧй ООШ) да О.М. Савельевалӧ (Архангельскӧй СОШ).

Апрель 6 лунӧ вӧлі чулӧтӧм чужан кыв велӧтіссез коласын Олимпиада. Параэз вылӧ торйӧтчӧмӧн велӧтіссез керисӧ тест, уджалісӧ технологическӧй картаэз вылын, мыччалісӧ ассяма мастер-классэз. Аттьӧ висьталам быд велӧтіссьлӧ, кин участвуйтіс Олимпиадаын, но торйӧн нылӧ, кин лоис вермисьӧн: Павлова Людмила Петровналӧ (Сепольскӧй школаись), Яркова Ирина Ивановналӧ (Белоевскӧй школаись), Рачёва Алёна Витальевналӧ (Больше-Кочинскӧй школаись), Попова Ольга Анатольевнаӧс (Кочёвскӧй школаись) Селина Людмила Ивановналӧ (Архангельскӧй школаись) да Тиунова Алевтина Николаевналӧ (Сергеевскӧй школаись) велӧтісезлӧ.

Ассиныс выннэз миян велӧтіссез мыччалісӧ и апрель 14 лунӧ Перемын, кӧр чулаліс «Учитель года» конкурслӧн краевӧй этап. Аттьӧалам вермиссезӧн эта конкурсын Татьяна Ивановна Гусельниковаӧс, Гуринскӧй школаись велӧтісьӧс, да Епанова Любовь Геннадьевнаӧс, Белоевскӧй школаись велӧтісьӧс.

Ыджыт аттьӧ висьталам Гусельникова Татьяна Ивановналӧ, кӧда мыччаліс ассис кужӧммез да тӧдӧммез и чужан кыв велӧтіссезлӧн Россия пасьта конкурс вылын. Сія торйӧтчис аслас опытӧн коми-пермяцкӧй кыв велӧтӧм сьӧрті.

Оз кольччӧ асланыс ёрт-велӧтіссез дынісь и челядь саддэзын уджаліссез. Тебенькова Мария Николаевна, Белоевскӧй челядь садісь уджалісь, да  Вилесова Людмила Николаевна, Кудымкарись 19 челядь садісь уджалісь, лоисӧ вермиссезӧн «Воспитатель» номинацияын всероссийскӧй конкурслӧн «Лучший учитель родного языка и родной литературы» региональнӧй этапын. Конкурс чулаліс июнь 21-22 луннэзӧ Перемын. Кык лун челядь саддэзісь уджаліссез мыччалісӧ ассиныс кужӧммез школа вотӧдзся челядькӧт коми-пермяцкӧй кыв сьӧрті велӧтӧмын. А сентябрь 19 лунӧ Тебенькова Мария Николаевна мыччаліс ассис кужӧммез да тӧдӧммез чужан кыв сьӧрті велӧтіссезлӧн Россия пасьта конкурс вылын. Сія висьтасис сы йылісь, кыдз уджалӧ школа вотӧдзся челядькӧт коми-пермяцкӧй кыв сьӧрті. Аттьӧалам велӧтіссезӧс бытшӧм опыт мыччалӧм понда да кӧсъям одзлань вермӧммез!

Октябрь 18 лунӧ вӧлі чулӧтӧм челядь саддэзын уджаліссез понда семинар. Перемись, Куедаись да Бардаись, Кудымкарскӧй, Юсьвинскӧй, Кочёвскӧй, Косинскӧй да Гайнскӧй районнэзісь челядь саддээзын уджаліссез висьтасисӧ быдкодь приёммэз да технологияэз йылісь, кӧдна отсалӧны чулӧтны удж коми-пермяцкӧй да татарскӧй кыв велӧтӧмын. Сёрни муніс программаэз, орсаннэз, проекттэз, быдкодь пособиеэз да аймамкӧт удж йылісь.

Эттшöм мероприятиеэз отсалӧны нылö, кин велöтö мам кыв челядькӧт да кин пыдынжыка бы тӧдӧ сы йылісь. И бӧра жӧ ыджыт аттьӧ висьталам нія велӧтіссезлӧ, кӧдна торйӧтсисӧ асланыс кужӧммезӧн.

Эта воӧ первуись чулӧтчис школаэз коласын вермасьӧм, кытӧн велӧтӧны коми-пермяцкӧй кыв. Ноябрь 10 лунӧ, вӧлісӧ керӧмӧсь итоггез вермасьӧм сьӧрті. Начальнӧй классэз коласын медодзза места шедтіс Кочёвскӧй районісь Сепольскӧй школа (велӧтіссез Павлова Л.П., Рожнева Е.А.) а основнӧйез коласын – Юсьвинскӧй районісь Архангельскӧй школа (велӧтіссез Селина Л.И., Савельева О.М.). Мӧдік места босьтісӧ начальнӧй классэз коласын Гайнскӧй районісь Иванчинскӧй школа (велӧтіссез Пипкина Л.Д., Вилисова О.И., Самкова Н.Н), а основнӧйез коласын – Гайнскӧй районісь Сергеевскӧй школа (велӧтіссез Тиунова А.Н., Кольчурина Е.В.). Куимӧт места босьтісӧ начальнӧй классэз коласын Кудымкарскӧй районісь Ошибскӧй школа (велӧтіссез Дудина Л.В., Лесникова Л.В., Мехоношина А.Н.), а основнӧйез коласын – Кудымкарскӧй районісь Гуринскӧй школа (велӧтіссез Пономарёва Н.С., Гусельникова Т.И., Петрова Е.В.). Аттьӧалам велӧтіссезӧс бур удж понда да кӧсъям виль вермӧммез!

Ноябрь 16 лунӧ Коми-Пермяцкӧй округись 28 велӧтчись Косинскӧй, Кудымкарскӧй, Кочёвскӧй да Юсьвинскӧй районнэзісь мыччалісӧ ассиныс тӧдӧммез коми-пермяцкӧй кыв, культура да история сьӧрті краевӧй олимпиада вылын. Медбуржыккезӧн асланыс классэз коласын лоисӧ Пономарёв Александр, Ошибскӧй шӧрӧт школаись велӧтчись (велӧтісь Петрова И.Г.), Власова Екатерина, Архангельскӧй шӧрӧт школаись велӧтчись (велӧтісь Савельева О.М.) да Лобанова Диана, Ошибскӧй шӧрӧт школаись велӧтчись (велӧтісь Петрова И.Г.).

Мӧдік места босьтісӧ Пичугина Диана, Больше-Кочинскӧй школаись велӧтчись (велӧтісь Рачёва А.В.), Рудова Кристина, Чазёвскӧй школаись велӧтчись (велӧтісь Ильиных М.А.) да Ильиных Лиза, Косинскӧй школаись велӧтчись (велӧтісь  Ильиных М.А.).

Куимӧт места босьтісӧ Тупицын Артём, Архангельскӧй школаись велӧтчись (велӧтісь Савельева О.М.), Лобанов Саша, Егоровскӧй школаись велӧтчись (велӧтісь Баранова Н.П.) да Ярков Егор Белоевскӧй школаись велӧтчись (велӧтісь Яркова И.И.).

Челядьлӧ кӧсъям одзлань локны ыджыт результаттэз дынӧдз! А велӧтіссезлӧ, кӧдна туйдӧтісӧ челядьӧс Олимпиада вылӧ, висьталам ыджыт аттьӧ!

Лабораторияын уджаліссез уджалӧны и сы вылын, медбы коми-пермяцкӧй кыв сьӧрті велӧтіссезлӧ вӧлі уджавны кокнитжык. Эта воӧ вӧлісӧ лӧсьӧтӧмӧсь федеральнӧй рабочӧй программаэз, да ны сьӧрті велӧтчан небӧггез. Сідз 2023 воӧ пондӧтчис удж начальнӧй школа понда литературнӧй чтеннёӧн учебнӧй пособиеэз керӧм вылын. Удж мунӧ Федосеева В.В. юралӧм увтын. Козлов В.В. юралӧм увтын мунӧ удж основнӧй школа понда велӧтчан небӧггез вылын.

2023 воӧ петісӧ виль велӧтчан небӧггез 1 – 4 классэз понда коми-пермяцкӧй кыв сьӧрті. Удж ны сьӧрті муніс куим во сьӧрна Велӧтіссезлісь удж бурсьӧтана Коми-Пермяцкӧй институтын.

Сідз жӧ эта воӧ пондӧтчис удж коми-пермяцкӧй кыв сьӧрті корпус лӧсьӧтӧм вылын. Чукӧрӧ, кӧда уджалӧ корпус вылын пырисӧ кык специалист Коми Республикаись, кӧдна уджалӧны компьютернӧй технологияэзӧн: Вячеслав Степанов да Дмитрий Левченко, и нёль специалист Пермскӧй крайись коми-пермяцкӧй кыв сьӧрті: Надежда Трубинова, Елена Матвеева, Любовь Утева да Ирина Дульцева. Чукӧрлӧн удж мунӧ Вилесова М.В. юралӧм увтын. Удж коми-пермяцкӧй кыв сьӧрті корпус лӧсьӧтӧм вылын пондас мунны куим во сьӧрна.

Уськӧтам тӧдвылӧ, мый 2023 восянь «Общество да власть» государственнӧй программаын вӧлі янсӧтӧм торья сьӧм коми-пермяцкӧй кыв зорӧтӧм вылӧ, кӧда и отсаліс чулӧтны конкурс, лэдзны небӧггез, небны оборудованнё коми-пермяцкӧй кабинеттэз понда, пондӧтны удж роч-коми-пермяцкӧй кывчукӧр да корпус вылын.

Эта воӧ пырис оланӧ и «Гора гижись» нима проект, кӧдӧ керис М.В.Вилесова, губернаторлӧн фонд сьӧм вылӧ. Проект отсаліс велӧтіссез понда керны видео-роликкез коми-пермяцкӧй лыддьӧтан уроккез кежӧ. Сідз «Библиотека ЭПОС» ресурс вылӧ вӧлі пуктӧм 7 видео-материал коми-пермяцкӧй гижиссез да учёнӧйез йылісь – этӧ В.В.Климов, Т.П.Фадеев, Г.М.Бачева, Н.В.Попов, Л.П.Гуляева, Н.В.Исаева-Бадина, В.В.Пахорукова йылісь.

Сідз кыдз эта годыс вӧлі йитӧм велӧтіськӧт, Лабораторияись уджаліссез эз кольччӧ бокӧ. Контактын «Год педагога и наставника» листбок вылӧ (https://vk.com/event218586443) лӧсьӧтісӧ статьяэз филологгез, велӧтіссез, коми-пермяцкӧй кыв да литература небӧггезлӧн авторрез йылісь – этӧ А.Т.Мошегова, Г.А.Калина, З.В.Распопова, Г.И.Немтинова, Т.З.Кривощёкова, В.В.Пахорукова, З.К.Тудвасева йылісь.

Лабораторияись уджаліссез участвуйтісӧ и быдкодь конкурссэзын. Эта воӧ институтын чулӧтчисӧ фотоэзӧн да эссеэзӧн конкурссэз, кӧдна вӧлісӧ йитӧмӧсь велӧтіськӧт. Эна конкурссэз вылӧ лабораторияись уджаліссез Галкина М.Е., Меркушева Т.Н. да Дерябина В.В. ыстісӧ материаллэз асланыс велӧтіссез йылісь.

Во кольччьӧ, а мийӧ мунам одзлань, вильланьӧ.

Быд велӧтісьлӧ, кин активнӧя сотрудничайтіс во сьӧрна Велӧтіссезлісь удж бурсьӧтана Коми-Пермяцкӧй институткӧт, висьталам ыджыт аттьӧ да вежалуналам Виль воӧн!

Дона миян коми йӧз,

Виль годӧн поздравляйтам!

Бурӧ-басӧксӧ быдӧс

Тіянлӧ ми желайтам!

Ась шуд тіянкӧт олӧ пыр

И шыннялӧм-быд ӧмын,

Ась сьӧм быдӧнныслӧн оз быр

И любитӧм-сьӧлӧмын.

Олан ась мунӧ медбура,

Уджавны б вӧлі места.

Ась муным годлӧн быд пора

Шыннялӧ кыдз невеста.

Шогӧттэз пышшӧны мед ась,

Здоровье быд семьялӧ.

Война ась пышшӧ, оз пантась!

Ась мирын мир паськалӧ!

Вилесова М.В., Дерябина В.В., Велӧтіссезлісь удж бурсьӧтана Коми-Пермяцкӧй институтісь научнӧй сотрудниккез